Пайдаланушы және лицензиялық келісім

ПАЙДАЛАНУШЫ КЕЛІСІМІ

Соңғы жаңартылған күні: [11.04.2026]

1. Анықтамалар

1.1. Осы Келісімнің мақсаттары үшін төменде келтірілген терминдер мен анықтамалар мынадай мағыналарда қолданылады:

«Келісім» — Пайдаланушы мен Компания арасында жасалатын осы Пайдаланушы келісімін білдіреді;

«Компания» — Қазақстан Республикасының заңнамасына сәйкес тиісті түрде тіркелген және Қосымшаның құқық иеленушісі болып табылатын БСН 260340014002 «FATON» жауапкершілігі шектеулі серіктестігін білдіреді;

«Пайдаланушы» немесе «Пайдаланушылар» — осы Келісімде айқындалған талаптармен Қосымшаны (i) Тауарларға Тапсырыстарды рәсімдеу және (ii) Жөнелтілімдерді жеткізуге Тапсырыстарды рәсімдеу мақсатында пайдаланатын әрекетке қабілетті жеке тұлғаны білдіреді;

«Қосымша» — Компания осы Келісімде көзделген талаптармен Пайдаланушыларға ұсынатын, мобильді құрылғыларға арналған және Тапсырыстарды рәсімдеуге, сондай-ақ Серіктестермен және Курьерлермен өзара іс-қимыл жасауға арналған «FATON» бағдарламалық жасақтамасын білдіреді;

«Төлем провайдері» — банк карталарын және өзге де электрондық төлем құралдарын пайдалана отырып төлемдерді өңдеу және жүргізу жөніндегі қызметтерді көрсететін, сондай-ақ картаны шығарған банк (эмитент-банк), эквайер-банк және Компания арасындағы технологиялық өзара іс-қимылды қамтамасыз ететін заңды тұлғаны немесе төлем ұйымын білдіреді;

«Тауар» — Серіктестер сатуға және/немесе дайындауға (қолданылатын жағдайларда) ұсынатын және Пайдаланушы Қосымша арқылы тапсырыс бере алатын кез келген тауарларды, өнімдерді немесе заттарды, соның ішінде, бірақ олармен шектелмей, азық-түлік өнімдерін, дайын тағамдарды, сусындарды, сондай-ақ азық-түлік емес тауарларды (оның ішінде киім-кешекті, гигиена құралдарын, тұрмыстық және өзге де тауарларды) білдіреді, бұл ретте мұндай тауарларды өткізуге Қазақстан Республикасының заңнамасында тыйым салынбауға тиіс;

«Жөнелтілім» — Пайдаланушы Қосымша арқылы Курьердің көмегімен басқа Пайдаланушыға немесе үшінші тұлғаға жеткізу үшін беретін құжаттарды, хат-хабарларды, сондай-ақ өзге де заттар мен тауарларды білдіреді. Пайдаланушы жөнелтуші мен алушыны көрсете отырып, кез келген А нүктесінен кез келген Б нүктесіне Жөнелтілімді жеткізуге тапсырыс бере алады. Кез келген жағдайда жеткізу ақысын тек Пайдаланушы төлейді;

«Сервистік алым» — Қосымшаның функционалдық мүмкіндіктеріне қол жеткізуді ұсынғаны, Тапсырысты өңдегені, Пайдаланушы, Серіктестер және Курьерлер арасындағы өзара іс-қимылды ұйымдастырғаны, сондай-ақ Компания көрсететін өзге де ілеспе қызметтер үшін Компанияның Пайдаланушыдан алатын төлемін білдіреді. Сервистік алымның мөлшерін Компания айқындайды және ол Тапсырыс расталғанға дейін Қосымшада көрсетіледі;

«Серіктес» — Пайдаланушылар Қосымша арқылы Тапсырыс рәсімдеген кезде оларға Тауарларды дайындауды және/немесе сатуды жүзеге асыратын, сондай-ақ мұндай функция Қосымшада көзделген жағдайларда Тауарларды Қосымша Пайдаланушыларына жеткізуді жүзеге асыратын заңды тұлғаны немесе жеке кәсіпкерді білдіреді;

«Курьер» — Тауарды тікелей Серіктес жеткізетін жағдайларды қоспағанда, Пайдаланушы Қосымша арқылы Серіктестен тапсырыс берген Жөнелтілімдерді және/немесе Тауарларды жеткізу жөніндегі қызметтерді көрсететін заңды тұлғаны, жеке кәсіпкерді немесе жеке тұлғаны (Компанияның қызметкері болып табылмайтын) білдіреді;

«Тапсырыс» — Пайдаланушы Қосымша арқылы Серіктестен Тауарларды сатып алуға немесе Жөнелтілімді жеткізуге рәсімдеген және тиісті Серіктес немесе Курьер орындауға қабылдаған сұрауды білдіреді;

«Қызметтер» — Қосымша арқылы Пайдаланушыға қолжетімді қызметтердің жиынтығын, соның ішінде Тауарларға Тапсырыс беруді, Тауарларды жеткізуді және Жөнелтілімдерді жеткізуді білдіреді.

2. Жалпы ережелер

2.1. Осы Келісім Компания мен Қосымшаны Пайдаланушылар арасындағы қатынастарды реттейді.

2.2. Осы Келісім Қазақстан Республикасы Азаматтық кодексінің 389-бабына сәйкес қосылу шарты болып табылады, оның талаптарын Компания айқындайды және екінші тарап, яғни Пайдаланушы, осы Келісімге тұтастай қосылу арқылы ғана қабылдай алады.

Қосымшаны пайдалану арқылы Пайдаланушы осы Келісімнің талаптарын оқып шыққанын, түсінгенін және оларды сақтауға келісетінін растайды.

2.3. Қосымша Пайдаланушыларға мынадай мүмкіндіктер беретін технологиялық платформаны ұсынады:

• Серіктестерден Тауарларға (оның ішінде азық-түлік өнімдері мен өзге де тауарларға) кейіннен Курьерлер арқылы жеткізілетін Тапсырыстарды орналастыру;
• жөнелтуші мен алушыны көрсету мүмкіндігімен Пайдаланушыдан үшінші тұлғаларға Жөнелтілімдерді жеткізуге тапсырмалар рәсімдеу, бұл ретте жеткізу ақысын Пайдаланушы төлейді.

2.4. Таңдалған Қызмет түріне байланысты Пайдаланушы тікелей құқықтық қатынастарға түседі:

• Серіктестермен (тауарларды сатушылармен);
• Курьерлермен (жеткізу кезінде).

Егер тікелей өзгеше көзделмесе, Компания барлық жағдайларда тек ақпараттық делдал және технологиялық платформаның иесі ретінде әрекет етеді.

3. Пайдаланушыны тіркеу

3.1. Қосымшаның жекелеген функцияларын пайдалану үшін Пайдаланушы есептік жазба (аккаунт) құруға міндетті.

3.2. Пайдаланушы:

• шынайы ақпарат ұсынуға;
• ұсынылған деректердің өзектілігін қамтамасыз етуге;
• есептік деректердің құпиялылығын қамтамасыз етуге міндеттенеді.

3.3. Пайдаланушы өзінің есептік жазбасын пайдалана отырып жасалған барлық әрекеттер үшін жауапты болады.

4. Тапсырыстарды орналастыру

4.1. Пайдаланушы Қосымша арқылы:

• Серіктестер ұсынатын Тауарларға Тапсырыстар орналастыруға;
• жөнелтуші мен алушыны көрсете отырып, үшінші тұлғаларға Жөнелтілімдерді жеткізуге Тапсырыстар рәсімдеуге құқылы, бұл ретте мұндай Тапсырыстардың ақысын Пайдаланушы төлейді.

4.2. Қызмет түріне байланысты:

• Тауарға Тапсырыс Серіктес оны растағаннан кейін қабылданды деп есептеледі;
• Жөнелтілімді жеткізуге Тапсырыс Курьер оны қабылдағаннан кейін қабылданды деп есептеледі.

4.3. Пайдаланушы:

• шынайы деректерді (мекенжайларды, байланыс деректерін, алушы туралы ақпаратты) ұсынуға;
• Тапсырысты орындау мүмкіндігін қамтамасыз етуге;
• Жөнелтілімдерді жеткізу кезінде Жөнелтілім мазмұнының заңдылығын қамтамасыз етуге міндеттенеді.

4.4. Пайдаланушыға жеткізу үшін мыналарды беруге тыйым салынады:

• айналымына тыйым салынған немесе айналымы шектелген заттарды;
• қауіпті, жарылғыш, улы заттарды;
• айналымы Қазақстан Республикасының заңнамасын бұзатын заттарды.

4.5. Пайдаланушының кінәсінен Тапсырысты орындау мүмкін болмаған жағдайда, Тапсырыс тиісті Қызмет құны қайтарылмай жойылуы мүмкін.

5. Бағалар және төлемдер

5.1. Қосымшада орналастырылған Тауарлардың бағаларын Серіктестер дербес және өз қалауы бойынша белгілейді. Компания Тауарлардың бағаларын белгілемейді және бақыламайды, сондай-ақ олардың өзектілігі, дәлдігі немесе Серіктестің нақты бағаларына сәйкестігі үшін жауап бермейді.

Серіктес Қосымшада бағаларды белгілеу және көрсету, сондай-ақ Қосымшада көрсетілген баға мен Тауардың нақты бағасы арасындағы кез келген сәйкессіздік үшін толық жауапты болады.

Бағалардың сәйкессіздігі анықталған жағдайда кез келген наразылықтар, талаптар немесе даулар Пайдаланушы мен тиісті Серіктес арасында тікелей реттелуге тиіс. Компания мұндай даулардың тарапы болып табылмайды және оларды реттеуге қатысуға міндетті емес.

5.2. Қосымша арқылы қолжетімді Қызметтердің құны олардың түріне байланысты қалыптастырылады және мыналарды қамтуы мүмкін:

Тауарларға Тапсырыстар үшін (тамақ өнімдерін және өзге де тауарларды жеткізу):

• Тауарлардың құны;
• жеткізу құны;
• Сервистік алымдар;
• қолданылатын салықтар, оның ішінде ҚҚС (қолданылатын болса);
• қаптама құны (егер ол Тауардың бағасына енгізілмесе).

Жөнелтілімдерді жеткізу үшін:

• қашықтық, уақыт, габариттер немесе өзге де параметрлер негізінде есептелетін жеткізу құны;
• Сервистік алымдар;
• Қосымшада көрсетілетін өзге де қолданылатын төлемдер.

Бұл ретте Пайдаланушы Қосымшада Серіктес көрсеткен Тауардың құнына қаптама құны енгізілмеуі мүмкін екенін қабылдайды және онымен келіседі. Заңнамада, міндетті талаптарда немесе стандарттарда көзделген жағдайларда қаптама құны Пайдаланушыдан қосымша алынуы мүмкін.

Атап айтқанда, Пайдаланушы Тапсырысты қалыптастыру және орындау кезінде пайдаланылатын пластикалық қаптаманың құны Тауардың құнынан бөлек алынуы мүмкін екеніне келіседі.

5.3. Төлем мынадай тәсілдермен жүзеге асырылуы мүмкін:

• банк картасымен;
• Тапсырысты алған кезде қолма-қол ақшамен;
• электрондық төлем жүйелері арқылы;
• Қосымшада қолжетімді өзге де тәсілдермен.

5.4. Төлемдерді үшінші тарап болып табылатын Төлем провайдерлері өңдеуі мүмкін. Банк картасымен төлем жасау үшін Пайдаланушы Қосымшада карта деректерін көрсетеді, содан кейін карта Пайдаланушының есептік жазбасына байланыстырылған төлем тәсілі ретінде сақталады. Компания өз серверлерінде банк карталарының толық деректемелерін сақтамайды және картаның тек соңғы төрт цифрына ғана қол жеткізе алады. Картаның толық деректері төлемдерді өңдеуді жүзеге асыратын тиісті Төлем провайдерінің серверлерінде сақталады.

5.5. Компания Төлем провайдерлері арқылы Серіктестер мен Курьерлердің атынан төлемдерді жинау жөніндегі агент ретінде Пайдаланушылардан төлемдерді қабылдайды. Төлем провайдерлері қажетті лицензиялар мен рұқсаттарды алуға, сондай-ақ төлем қызметтеріне қолданылатын Қазақстан Республикасы заңнамасының талаптарын сақтауға жауапты болады. Компания мұндай рұқсаттардың болмауы немесе заңнама талаптарының бұзылуы үшін жауап бермейді — толық жауапкершілік тиісті Төлем провайдеріне жүктеледі.

5.6. Пайдаланушының Қосымша арқылы жасаған төлемі төлем жөніндегі міндеттеменің тиісінше орындалуы болып есептеледі және Пайдаланушыны тиісті соманы Серіктестерге немесе Курьерге тікелей төлеу міндетінен босатады.

5.7. Пайдаланушы Тапсырыстың талаптарына байланысты:

• төлем Тапсырысты рәсімдеу сәтінде есептен шығарылуы мүмкін;
• не Тапсырыс орындалғаннан кейін есептен шығарылуы мүмкін екеніне келіседі.

5.8. Тапсырыс жойылған жағдайда ақшалай қаражатты қайтару осы Келісімнің 7-бөліміне және тиісті Төлем провайдерінің қағидаларына сәйкес жүзеге асырылады.

5.9. Компания:

• Төлем провайдерлерінің әрекеттері немесе әрекетсіздігі үшін;
• төлем жүргізуден бас тарту үшін;
• банктік немесе төлем жүйелерінің жұмысынан туындаған ақшалай қаражатты қайтарудың кешіктірілуі үшін жауап бермейді.

6. Жеткізу

6.1. Тауарлар мен Жөнелтілімдерді жеткізуді Компанияның тәуелсіз серіктестері болып табылатын Курьерлер жүзеге асырады.

6.2. Қосымшада көрсетілген Тауарды/Жөнелтілімді жеткізу уақыты болжамды болып табылады. Компания нақты жеткізу мерзімдеріне кепілдік бермейді, өйткені олар Компанияның тікелей бақылауына жатпайтын бірқатар факторларға, оның ішінде Серіктестердің жұмысына, Тапсырыстарды дайындау уақытына, Курьерлердің әрекеттеріне, сондай-ақ Тапсырысты рәсімдеу кезінде Пайдаланушы ұсынған ақпараттың дұрыстығына және Тапсырысты орындау кезінде Пайдаланушының қолжетімді болуына байланысты.

6.3. Осыған байланысты Қосымшада көрсетілетін Тауарларды/Жөнелтілімдерді жеткізу уақыты болжамды сипатта болады. Компания сондай-ақ қолжетімді Курьерлердің болуына және олардың Тапсырыстарды жеткізуге байланысты тапсырмаларды тиісінше орындауына, соның ішінде, бірақ олармен шектелмей, белгіленген маршруттарды, уақытты немесе Тапсырыстың өзге де талаптарын сақтауына жауап бермейді.

6.4. Жеткізу мерзімдеріне сондай-ақ мынадай факторлар әсер етуі мүмкін:

• ауа райы жағдайлары;
• жолдағы жағдай;
• Серіктестердің/Курьерлердің жүктемесі;
• Компанияға немесе оның серіктестеріне байланысты емес өзге де мән-жайлар.

6.5. Пайдаланушы:

• тасымалдауды Компанияның қызметкерлері болып табылмайтын үшінші тұлғалар жүзеге асыратынына;
• Компания заң тұрғысынан экспедитор немесе жеткізу қызметі болып табылмайтынына келіседі.

7. Тапсырысты жою және ақшалай қаражатты қайтару

7.1. Пайдаланушы Қызмет түріне және Тапсырыстың орындалу кезеңіне байланысты белгіленетін тәртіппен және талаптармен Тапсырысты жоюға құқылы.

7.2. Тауарларға Тапсырыстар (тамақ өнімдері және өзге де тауарлар)

7.2.1. Пайдаланушы Тапсырысты Серіктес оны дайындауды бастағанға дейін қандай да бір ақы алынбай жоюға құқылы.

7.2.2. Тапсырыс оны дайындау басталғаннан кейін жойылған жағдайда:

• Пайдаланушыдан Тауарлардың құны алынуы мүмкін;
• Тауарларды дайындаудың басталғаны туралы хабарлама Қосымша арқылы жіберіледі.

7.2.3. Егер Курьер Тапсырысты қабылдап қойған болса:

• жеткізуді жойғаны үшін ақы алынуы мүмкін;
• мұндай төлемнің мөлшері Қосымшада көрсетіледі.

7.2.4. Егер Тапсырысты Серіктес те, Курьер де қабылдаған болса:

• Пайдаланушыдан Тауарлардың құны да, жеткізу ақысы да алынуы мүмкін.

7.3. Жөнелтілімдерді жеткізу

7.3.1. Пайдаланушы Тапсырысты Курьер қабылдағанға дейін қандай да бір ақы алынбай жоюға құқылы.

7.3.2. Тапсырыс Курьер қабылдағаннан кейін жойылған жағдайда:

• Пайдаланушыдан Тапсырысты жойғаны үшін ақы алынуы мүмкін;
• төлем мөлшері Тапсырыстың орындалу кезеңіне (оның ішінде Курьердің келуіне, күтуіне, жеткізудің басталуына) байланысты болады.

7.3.3. Егер Курьер Жөнелтілімді алу орнына келіп қойған болса:

• Курьердің келуі және/немесе күткені үшін ақы алынуы мүмкін.

7.3.4. Пайдаланушының кінәсінен Жөнелтілімді беру мүмкін болмаған жағдайда:

• Тапсырыс ішінара немесе толық орындалды деп есептелуі мүмкін;
• ақшалай қаражат қайтарылмайды не ішінара қайтарылады.

7.5. Ақшалай қаражатты қайтару туралы жалпы ережелер

7.5.1. Егер Төлем провайдерінің қағидаларында өзгеше көзделмесе, ақшалай қаражат төлем жасалған тәсілмен қайтарылады.

7.5.2. Ақшалай қаражатты қайтару мерзімдері:

• Пайдаланушының банкіне;
• Төлем провайдеріне;
• төлем тәсіліне байланысты.

7.5.3. Компания мынадай жағдайларда ақшалай қаражатты қайтарудан бас тартуға құқылы:

• Тапсырыс тиісінше орындалған болса;
• Тапсырысты жою осы Келісімнің талаптарын бұза отырып жүзеге асырылған болса;
• теріс пайдалану немесе алаяқтық белгілері анықталған болса.

7.5.4. Техникалық қателер, қаражаттың екі рет есептен шығарылуы немесе өзге де ақаулар орын алған жағдайда Компания төлемдерге тиісті түзетулер енгізуге құқылы.

7.6. Төлемдер бойынша даулар

7.6.1. Төлеммен келіспеген жағдайда Пайдаланушы алдымен Компанияның қолдау қызметіне жүгінуге міндетті.

7.6.2. Пайдаланушы Компанияға алдын ала жүгінбей, төлемді негізсіз кері қайтару (chargeback) рәсімдерін бастамауға міндеттенеді.

7.6.3. Осы міндеттеме бұзылған жағдайда Компания:

• Пайдаланушының Қосымшаға қол жеткізуін шектеуге;
• Қызметтер көрсетуді тоқтата тұруға;
• келтірілген залалдарды Қазақстан Республикасының заңнамасында белгіленген тәртіппен өндіріп алуға құқылы.

8. Пайдаланушының міндеттері

8.1. Пайдаланушы:

• Қосымшаны құқыққа қайшы мақсаттарда пайдаланбауға;
• үшінші тұлғалардың құқықтарын бұзбауға;
• Қосымшаның жұмыс істеуін бұзатын немесе оған кедергі келтіретін әрекеттерді жасамауға;
• Қосымшаға қол жеткізудің автоматтандырылған құралдарын (боттарды, скрипттерді) пайдаланбауға міндеттенеді.

9. Жауапкершілікті шектеу

9.1. Компания:

• Тауардың сапасы, қауіпсіздігі және құрамы үшін;
• Серіктестердің әрекеттері немесе әрекетсіздігі үшін;
• Курьерлердің әрекеттері немесе әрекетсіздігі үшін;
• Курьерлердің жеткізуді кешіктіруі үшін;
• Пайдаланушылардың жанама залалдары үшін жауап бермейді.

Компания жауапкершілігінің ең жоғары мөлшері нақты Тапсырыстың құнымен шектеледі.

9.2. Пайдаланушы Компанияның Тауарды өндіруші болып табылмайтынын және Қосымша арқылы ұсынылатын Тауарды дайындау, оның сапасы мен қауіпсіздігі және (немесе) көрсетілетін қызметтер үшін, сондай-ақ Қосымша арқылы сұратылған кез келген тапсырманың немесе жеткізудің орындалуы үшін жауап бермейтінін хабардар етілгенін растайды.

9.3. Пайдаланушы Компанияның тек делдал ретінде әрекет ететінін және Курьерлер және/немесе Серіктестер ұсынған мәліметтер үшін жауап бермейтінін растайды және онымен келіседі. Компания сондай-ақ осы Келісімнің талаптарын бұзу нәтижесінде Пайдаланушыларға келтірілуі мүмкін қандай да бір шығындар немесе залал үшін жауап бермейді.

9.4. Пайдаланушының Қосымшада Тапсырыс орналастыруы және оны Серіктестің және/немесе Курьердің қабылдауы Пайдаланушы мен Серіктес және/немесе Курьер арасында тікелей құқықтық қатынастардың туындауын білдіреді. Компания мұндай құқықтық қатынастардың тарапы болып табылмайды және тараптардың өзара іс-қимыл жасауына және Тапсырыстар орналастыруына мүмкіндік беретін технологиялық платформа ретінде Қосымшаны ұсынумен ғана шектеледі.

9.5. Компания Курьерлер мен Серіктестерге қатысты, оның ішінде олардың жеке басына, біліктілігіне немесе кәсіби тәжірибесіне қатысты қандай да бір кепілдіктер, мәлімдемелер немесе растаулар бермейді.

9.6. Пайдаланушыға айналымына Қазақстан Республикасының заңнамасында, сондай-ақ осы Келісімде тыйым салынған немесе шектеу қойылған кез келген заттар мен нәрселерді жеткізуге беруге тыйым салынады.

9.7. Тыйым салынған Жөнелтілімдерге, атап айтқанда, мыналар жатады:

• есірткі құралдары, психотроптық заттар және олардың аналогтары;
• қару-жарақ, оқ-дәрілер, жарылғыш заттар, сондай-ақ олардың құрамдас бөліктері;
• улы, уландырғыш, радиоактивті және өзге де қауіпті заттар;
• тез тұтанатын сұйықтықтар мен материалдар;
• тірі жануарлар;
• биологиялық материалдар;
• зияткерлік меншік құқықтарын бұзатын заттар;
• заңсыз жолмен алынған тауарлар;
• алкоголь және темекі өнімдері (егер қолданылатын заңнамада өзгеше рұқсат етілмесе);
• тасымалдауға тыйым салынған немесе Курьерге, үшінші тұлғаларға не мүлікке зиян келтіруі мүмкін өзге де заттар.

9.8. Пайдаланушы Жөнелтілімнің мазмұны:

• заңды болып табылатынына;
• тасымалдау үшін қауіпсіз екеніне;
• мәлімделген сипаттамаға сәйкес келетініне кепілдік береді.

9.9. Егер Жөнелтілім осы Келісімнің талаптарын немесе Қазақстан Республикасының заңнамасын бұзады деп пайымдауға жеткілікті негіздер болса, Компания мен Курьер Тапсырысты орындаудан бас тартуға құқылы.

9.10. Пайдаланушы Жөнелтілімнің мазмұны үшін толық жауапты болады және Компанияға, Курьерге немесе үшінші тұлғаларға келтірілген кез келген залалды өтеуге міндеттенеді.

9.11. Компания пошта операторы, экспедитор немесе тасымалдаушы болып табылмайды.

9.12. Компания:

• Жөнелтілімдердің жоғалуы, бүлінуі немесе жеткізілуінің кешіктірілуі үшін;
• Жөнелтілім мазмұнының мәлімделген сипаттамаға сәйкес келмеуі үшін;
• Курьерлердің әрекеттері немесе әрекетсіздігі үшін жауап бермейді.

9.13. Жөнелтілімдерді жеткізуге байланысты барлық наразылықтар Пайдаланушы мен Курьер арасында тікелей реттелуге тиіс.

10. Қосымшаны пайдалануға лицензия беру

10.1. Қосымшаға, оның ішінде бағдарламалық кодқа, интерфейске, дизайнға, графикалық элементтерге, дерекқорларға, мәтіндік материалдарға және зияткерлік меншіктің өзге де объектілеріне айрықша құқықтар Компанияға тиесілі не Компания оларды заңды негіздерде пайдаланады.

10.2. Компания Пайдаланушыға Қосымшаның функционалдық мүмкіндіктері шегінде және осы Келісімнің талаптарына сәйкес Қосымшаны тек жеке, коммерциялық емес мақсаттарда пайдалануға қарапайым (айрықша емес), басқа тұлғаларға берілмейтін, шектеулі және кері қайтарып алынатын лицензия береді.

10.3. Көрсетілген лицензияның берілуі Пайдаланушыға Қосымшаға немесе оның жекелеген элементтеріне қандай да бір айрықша құқықтардың берілуін білдірмейді.

10.4. Пайдаланушы Қосымшаны тек мынадай тәсілдермен пайдалануға құқылы:

• Қосымшаны өзіне тиесілі мобильді құрылғыларға орнатуға және іске қосуға;
• Тапсырыстарды рәсімдеу және Серіктестермен және Курьерлермен өзара іс-қимыл жасау үшін Қосымшаның функционалдық мүмкіндіктерін пайдалануға;
• Қосымшаның функционалында тікелей көзделген өзге де әрекеттерді жүзеге асыруға.

10.5. Пайдаланушы Компанияның алдын ала жазбаша келісімінсіз:

• Қосымшаны немесе оның жекелеген элементтерін көшіруге, өзгертуге, бейімдеуге немесе қайта өңдеуге;
• Қосымшаны декомпиляциялауға, дизассемблирлеуге немесе оған қатысты өзге де кері жобалауды жүзеге асыруға;
• Қосымшаны таратуға, беруге, жалға беруге, сублицензиялар беруге немесе өзге де тәсілмен үшінші тұлғаларға Қосымшаға қол жеткізу мүмкіндігін беруге;
• Қосымшаны осы Келісімде көзделмеген кез келген тәсілмен пайдалануға құқылы емес.

11. Қосымшаның контенті. Пайдаланушы контенті

11.1. Қосымшаның контенті

11.1.1. Қосымшада орналастырылған барлық материалдар мен ақпарат, оның ішінде мәтіндер, кескіндер, графикалық материалдар, логотиптер, интерфейс, дизайн элементтері, дерекқорлар және өзге де объектілер Компанияның немесе үшінші тұлғалардың зияткерлік меншік объектілері болып табылады және Қазақстан Республикасының заңнамасына сәйкес қорғалады.

11.1.2. Пайдаланушы Қосымшаның контентін тек Қосымшаның функционалдық мүмкіндіктерін пайдалану мақсатында және өзіне берілген лицензия шегінде пайдалануға құқылы.

11.1.3. Қазақстан Республикасының заңнамасында тікелей көзделген жағдайларды қоспағанда, Пайдаланушы Компанияның алдын ала жазбаша келісімінсіз Қосымшаның контентін көшіруге, таратуға, жариялауға, өзгертуге немесе өзге де тәсілмен пайдалануға құқылы емес.

11.2. Пайдаланушы контенті

11.2.1. Пайдаланушы Қосымшада контентті, оның ішінде, бірақ олармен шектелмей, пікірлерді, түсініктемелерді, бағаларды, кескіндерді, мәтіндік материалдарды және өзге де мәліметтерді (бұдан әрі — «Пайдаланушы контенті») орналастыруға құқылы.

11.2.2. Пайдаланушы өзі орналастыратын Пайдаланушы контенті үшін, оның ішінде оның мазмұны, дұрыстығы және Қазақстан Республикасының заңнамасына сәйкестігі үшін дербес және толық жауапты болады.

11.2.3. Пайдаланушы өзі орналастыратын контенттің:

• заңсыз, зиянды, қорлайтын, жала жабатын, кемсітушілік сипаттағы немесе үшінші тұлғалардың құқықтары мен заңды мүдделерін өзге де түрде бұзатын сипатта болмайтынына;
• қорқытуларды, қорлауды, өшпенділік тілін немесе әдепсіз сөздерді қамтымайтынына;
• үшінші тұлғалардың зияткерлік меншік құқықтарын, оның ішінде авторлық және сабақтас құқықтарды, тауар белгілеріне құқықтарды және өзге де айрықша құқықтарды бұзбайтынына;
• үшінші тұлғалардың келісімінсіз олардың құпия ақпаратын қамтымайтынына;
• Қазақстан Республикасы заңнамасының талаптарына сәйкес келетініне кепілдік береді және міндеттенеді.

11.2.4. Пайдаланушы контентіне байланысты үшінші тұлғалар Компанияға наразылықтар, талап қоюлар немесе өзге де талаптар қойған жағдайда, Пайдаланушы мұндай наразылықтар мен талаптарды өз бетінше және өз есебінен реттеуге, сондай-ақ Компания шеккен барлық залалдарды өтеуге міндеттенеді.

11.2.5. Компания Пайдаланушы контентіне алдын ала модерация жүргізуге міндетті емес, алайда кез келген уақытта алдын ала хабарламай:

• Пайдаланушы контентін тексеруге, редакциялауға, оған қол жеткізуді шектеуге немесе оны жоюға;
• Компанияның пікірінше осы Келісімнің талаптарын немесе Қазақстан Республикасының заңнамасын бұзатын контентті бұғаттауға немесе жоюға;
• Пайдаланушының контент орналастыру функционалына қол жеткізуін шектеуге немесе тоқтата тұруға;
• жүйелі немесе өрескел бұзушылықтар орын алған жағдайда Пайдаланушының есептік жазбасын бұғаттауға құқылы, бірақ мұны жасауға міндетті емес.

11.2.6. Компания Пайдаланушы контентін жоюға немесе оған қол жеткізуді шектеуге құқылы, егер ол:

• үшінші тұлғалардың құқықтарын бұзса;
• Қазақстан Республикасының заңнамасын бұзса;
• қорлау, қорқыту немесе кемсітушілік сипаттағы пікірлерді қамтыса;
• басқа Пайдаланушыларды жаңылыстырса;
• Компанияның немесе үшінші тұлғалардың іскерлік беделіне нұқсан келтіруі мүмкін болса;
• Компанияның қалауы бойынша өзге де негіздермен жол берілмейтін деп танылса.

11.2.7. Пайдаланушы Пайдаланушы контентін орналастыра отырып, Компанияға мұндай контентті Қосымшаның жұмыс істеуін қамтамасыз ету, оны ілгерілету және жетілдіру мақсаттарында пайдалануға, оның ішінде оны қайта шығаруға, таратуға, көпшілік алдында көрсетуге және қайта өңдеуге айрықша емес, өтеусіз және бүкіл әлем аумағында қолданылатын лицензия береді.

11.2.8. Кез келген тұлға орналастырылған Пайдаланушы контентіне байланысты құқықтардың бұзылғаны туралы Компанияға хабарлама жіберуге құқылы. Компания растайтын құжаттарды сұратуға және өз қалауы бойынша тиісті шаралар қабылдауға құқылы.

11.2.9. Компания Пайдаланушы контентінің дәлдігіне, толықтығына немесе сапасына кепілдік бермейді және Пайдаланушылардың оны орналастыруға байланысты әрекеттері үшін жауап бермейді.

12. Қосымшаны жаңарту

12.1. Компания өз қалауы бойынша жаңартуларды, жаңа нұсқаларды және қателерді түзететін жаңартуларды шығаруға, сондай-ақ Қосымшаның функционалдық мүмкіндіктерін өзгертуге құқылы.

12.2. Қосымшаның дұрыс жұмыс істеуі үшін Пайдаланушыға жаңартуларды орнату қажет болуы мүмкін. Жекелеген жағдайларда Қосымшаның жаңартылған нұсқасын орнатпай оны пайдалану шектелуі немесе мүмкін болмауы мүмкін.

12.3. Егер Қазақстан Республикасының заңнамасында өзгеше көзделмесе, Компания Пайдаланушыларды алдын ала хабардар етпей, Қосымшаның жекелеген сервистерінің немесе функцияларының жұмысын өзгертуге, тоқтата тұруға немесе тоқтатуға құқылы.

13. Бағдарламалық жасақтамаға қатысты жауапкершілікті шектеу

13.1. Қосымша Пайдаланушыға «бар күйінде» (as is) қағидаты бойынша ұсынылады. Компания Қосымшаның үздіксіз, қауіпсіз және қатесіз жұмыс істейтініне кепілдік бермейді.

13.2. Компания Қосымшаның Пайдаланушының күтулеріне сәйкес келетініне, сондай-ақ оның нақты құрылғылармен, операциялық жүйелермен немесе Пайдаланушы пайдаланатын бағдарламалық жасақтамамен үйлесімділігіне кепілдік бермейді.

13.3. Қазақстан Республикасының заңнамасында тікелей көзделген жағдайларды қоспағанда, Компания Қосымшаны пайдалануға немесе оны пайдалану мүмкіндігінің болмауына байланысты туындаған кез келген шығындар, залал, деректердің жоғалуы, айырылып қалған пайда немесе өзге де қолайсыз салдарлар үшін жауап бермейді.

13.4. Компания сондай-ақ үшінші тұлғалардың әрекеттерінен, Пайдаланушы жабдығының техникалық ақауларынан, байланыс немесе интернет желісіндегі проблемалардан не Пайдаланушы пайдаланатын бағдарламалық жасақтаманың жұмысындағы ақаулардан туындаған Қосымша жұмысындағы іркілістер үшін жауап бермейді.

14. Қосымшаға қол жеткізуді тоқтата тұру және тоқтату

Компания мынадай жағдайларда Пайдаланушының Қосымшаға қол жеткізуін тоқтата тұруға немесе тоқтатуға құқылы:

• осы Келісімнің талаптары бұзылған жағдайда, оның ішінде Тапсырыс үшін ақы төленбеген жағдайда;
• алаяқтық әрекеттерге күдік туындаған жағдайда;
• Қызметтерді теріс пайдаланған жағдайда;
• осы Келісімде және/немесе Қазақстан Республикасының заңнамасында көзделген өзге де жағдайларда.

15. Дербес деректерді қорғау

Дербес деректерді жинау және өңдеу Қосымшаның Құпиялылық саясатына және Қазақстан Республикасының заңнамасына, оның ішінде Қазақстан Республикасының «Дербес деректер және оларды қорғау туралы» Заңына сәйкес жүзеге асырылады.

16. Келісім талаптарын өзгерту

16.1. Компания осы Келісімге мезгіл-мезгіл өзгерістер енгізуге құқылы.

16.2. Келісімнің жаңартылған нұсқасы сайтта немесе Қосымшада жарияланады және жарияланған сәттен бастап күшіне енеді.

16.3. Пайдаланушы осы Келісімге енгізілетін өзгерістер мен жаңартуларды өз бетінше қадағалауға міндеттенеді. Келісімге өзгерістер енгізілгеннен кейін Қосымшаны пайдалануды жалғастыру Пайдаланушының осындай өзгерістермен келісуі болып есептеледі.

16.4. Егер Пайдаланушы Келісімге енгізілген өзгерістер мен жаңартулардың талаптарымен келіспесе, ол Қосымшаны пайдалануды тоқтатуға және өзінің есептік жазбасын жоюға міндетті.

17. Қолданылатын құқық және дауларды шешу

17.1. Осы Келісім Қазақстан Республикасының заңнамасымен реттеледі.

17.2. Барлық даулар келіссөздер жүргізу арқылы шешілуге тиіс, ал келісімге қол жеткізу мүмкін болмаған жағдайда даулар Қазақстан Республикасының Азаматтық процестік кодексіне сәйкес Қазақстан Республикасының соттарында шешіледі.

18. Форс-мажор

18.1. Егер Компанияның өз міндеттемелерін толық немесе ішінара орындамауы Тапсырыс қабылданғаннан кейін туындаған және Компанияның ақылға қонымды бақылауынан тыс еңсерілмейтін күш мән-жайларынан (форс-мажордан) туындаса, Компания мұндай орындамау үшін жауапты болмайды.

18.2. Мұндай мән-жайларға, атап айтқанда, мыналар жатады:

• дүлей зілзалалар мен табиғи апаттар (жер сілкіністері, су тасқындары, өрттер, дауылдар, эпидемиялар және табиғи сипаттағы өзге де төтенше жағдайлар);
• Қосымшаның жұмыс істеуі үшін қажетті телекоммуникациялық желілердің, интернеттің, навигациялық жүйелердің, деректерді өңдеу орталықтарының, төлем жүйелерінің немесе өзге де техникалық инфрақұрылымның жұмысындағы үзілістер, ақаулар немесе олардың жұмысының тоқтатылуы;
• мемлекеттік органдар мен жергілікті өзін-өзі басқару органдарының әрекеттері немесе әрекетсіздігі, оның ішінде нормативтік құқықтық актілердің қабылдануы, міндеттемелерді орындау мүмкіндігіне әсер ететін шектеулердің, тыйымдардың, төтенше жағдай режимдерінің немесе өзге де шаралардың енгізілуі;
• жаппай тәртіпсіздіктер, ереуілдер, террористік актілер, әскери іс-қимылдар немесе олардың туындау қаупі;
• Қосымшаның жұмыс істеуі үшін пайдаланылатын үшінші тұлғалардың сервистерінің, бағдарламалық жасақтамасының немесе инфрақұрылымының жұмысындағы үзілістер;
• Компанияның ақылға қонымды бақылауынан тыс және міндеттемелерді орындауға кедергі келтіретін өзге де мән-жайлар.

18.3. Осындай мән-жайлар әрекет еткен кезеңде Компания Пайдаланушы алдында қандай да бір жауапкершілік туындамай, өз міндеттемелерін орындауды, оның ішінде Тапсырыстарды өңдеуді және жеткізуді тоқтата тұруға құқылы. Еңсерілмейтін күш мән-жайлары тоқтатылғаннан кейін Компания Қызметтер көрсетуді қайта бастау үшін ақылға қонымды шаралар қабылдайды.

19. Байланыс ақпараты

«FATON» жауапкершілігі шектеулі серіктестігі

БСН: 260340014002

Заңды мекенжайы: Қазақстан Республикасы, Алматы қаласы, Әуезов ауданы, Жандосов көшесі, 87-үй, пошта индексі 050043

Банктік деректемелері:

«Қазақстан Халық Банкі» АҚ

БСК: HSBKKZKX

КБе: 17

ЖСК: KZ19601A491002751321

Электрондық пошта: info@faton.kz